Saturday, January 14, 2012

قصاقيص، اتجننت فى سجن المرج - 25


- نباتى
بفكر بجدية انى أبقى نباتى وأبطل آكل أى أطعمة حيوانية، بس حاسس انى محتاج أقرا أكتر فى الموضوع دة… النقطة اللى لسة مش مقتنع بيها هى ان النباتيين بيقولوا ان مش معنى اننا أسمى تطورياً من الحيوانات اننا ناكلهم، فهل معنى اننا أسمى تطورياً من النباتات اننا برضه مناكلش النباتات؟ طيب هناكل ايه لو مأكلناش الحيوانات ولا النباتات؟ أنا مش سعيد بقتل الحيوانات، بس ايه البديل؟ 2011/12/4

- القبلة وفرويد
حلمت انى أقبلها. شعرت بالغضب حينما استيقظت لأنها أكثر أنثى أكرهها على سطح الكوكب… تذكرت ما قاله فرويد، ولعنته… كم أنت صادق يا فرويد! 2011/12/6

- تهديد لمارك
النهاردة بعد الجلسة، ظابط فى الجيش قالى ”ما تسيبلنا أخوك يقعد معانا أسبوع“. بيهددونى للمرة المليون بالقبض عليه… مش عارف ليه حاسس ان الجيش لو فضل يتصرف بالأسلوب دة، شكلنا هندخل قريب وزارة الدفاع على دبابات ال78 واحنا بنهتف ”الشعب واليو إن إيد واحدة“. 2011/12/7

- خالد علاء
عرفت ان منال بهى الدين زوجة علاء عبد الفتاح جابت خالد امبارح فى ظل استمرار حبس علاء، نفس اللى حصل مع والدة علاء لما خلفت فى ظل سجن زوجها أحمد سيف الإسلام… لو كان الأمر بيدى، لما سبت علاء، دى مش بلد الواحد يتجوز ويخلف فيها، دى بلد الواحد يموت أو تتفقع عينيه فيها ‎:(‎‏ 2011/12/7

- مسجون فى عهد الجنزورى
بعد ما الجنزورى حلف اليمين النهاردة الصبح، بقى الجنزورى تانى رئيس وزراء أنا مسجون فى عهده. أنا اتسجنت فى عهد وزارة شرف الأولى والتانية ووزارة الجنزورى، وعاصرت وزراء داخلية، واتسجنت فى وجود ”يحيى الجمل“ و”على السلمى“ و”حازم الببلاوى“ و”جودة عبد الخالق“ ومحدش فيهم اعترض على سجنى… المرحلة الانتقالية بتعرى كتير من الوجوه. 2011/12/7

- ليزا سمبسون
برنامج فى الراديو بيتكلم عن ايه الشخصية الكارتونية اللى الناس بيحبوا انها تبقى واقع… فكرونى بقصة حبى الكبيرة: ليزا سيمسبون… عااا 2011/12/7

- أمريكا والصراع فى الشرق الأوسط
أنا مش بعادى أمريكا ولا مصاب بجنون الاضطهاد ولا عندى نظرية مؤامرة، بس فيه حقايق ضرورى نكون عارفينها… أمريكا من مصلحتها ان النظام الإيرانى يفضل موجود، علشان يفضل فيه تهديد لأمن الخليج، وبالتالى دول الخليج تفضل فى تحالف مع أمريكا، وبكدة أمريكا تكون أمنت مصادر النفط ليها، بجانب انها بتستفيد من مبيعات الأسلحة اللى بتبيعها لدول الخليج علشان يقووا جيوشهم ضد إيران… أمريكا برضه من مصلحتها استمرار الصراع بين مصر وإسرائيل، علشان تفضل إسرائيل حليفة ليها، ويفضل النظام المصرى عميل ليها، وتفضل كل أطراف الصراع تشترى سلاح من أمريكا. ولاحظوا ان كل أطراف الصراع العربى الإسرائيلى بتشترى سلاح أمريكى (مصر – إسرائيل – الأردن – لبنان – تركيا)، ومش فاضل غير سوريا اللى هتبتدى تشترى السلاح الأمريكى بعد انهيار نظام الأسد…
لم يكذب تشرشل حينما قال أن ”السياسة لعبة قذرة“. 2011/12/8

- مليونية ضد التجنيد الإجبارى
بحلم باليوم اللى تحرج فيه مليونية فى ميدان التحرير ضد نظام التجنيد الإجبارى… هل دة ممكن يحصل؟ 2011/12/9

- الإفراط فى التوقعات
سعيد جداً بكل الرسايل اللى الناس بتبعتهالى هنا فى السجن، بتشجعنى انى أتخلص من الإحباط والاكتئاب اللى بيحاصرونى هنا فى السجن… بس شايف ان الناس (أو ناس كتير) شايفانى بطل خرافى، وبيبالغوا فى توقعاتهم منى. دة بيفكرنى بقصة كتبها توفيق الحكيم عن قارئ كان بيحبه جداً، لكن لما القارئ دة قابل توفيق الحكيم، لقاه شخص عادى، مش زى الصورة المبالغ فيها اللى رسمهاله فى دماغه، وزعل جداً… أنا مش عايز أخسر الناس لما بيبالغوا فى توقعاتهم عنى، وبعدين يلاقونى مجرد إنسان عادى قرر فى يوم انه يعمل الصح. 2011/12/12

- هل يأتى ذلك اليوم الأسود؟
بشوف كابوس كتير اليومين دول، بشوفه فى صحيانى، مش فى النوم… بخاف يتكرر اللى حصل فى يناير 1953 وسبتمبر 1981… خايف من اليوم اللى فى فجره تقف عربيات الشرطة العسكرية تحت بيوت كل النشطاء، وتقبض عليهم بملابس النوم، وتصحى مصر تلاقى الثوار فى السجون والعسكر لزقوا على الكراسى… مصادر كتير أكدتلى ان خطة الجيش جاهزة من زمان، وقوايم النشطاء جاهزة، مش فاضل غير بس التعليمات! 2011/12/13

- أنا اللى اخترت
النهاردة الظابط (اللى بيقولوا عليه قاضى عسكرى) حكم عليا بسنتين سجن… مزعلتش، أنا اللى اخترت دة… أنا اللى اخترت دة لما نشرت مقالى ”الجيش والشعب عمرهم ما كانو إيد واحدة“، وساعتها كتبت على پروفايلى على الفيس ”أنا حاسس انى لما بنشر المقال دة كأنى بنشر شهادة وفاتى، بس لو ماعملتش كدة مبقاش مايكل نبيل“… أنا اللى اخترت لما رفضت أعتذر، وقبلها لما رفضت المناصب اللى عُرضت عليا لما كانوا عايزين يجندونى… أنا اللى اخترت لما رفضت أهاجر ومقبلتش اللجوء السياسى… أنا اللى اخترت لما رفضت الخدمة العسكرية كتبت ساعتها ”أرفض الخدمة العسكرية وأتحمل النتائج“… يا حضرة الظابط، أنا اللى اخترت مش انت. 2011/12/14

- بيعاقبونى على رفضى الخدمة العسكرية
تاريخ الإفراج عنى فى الحكم الجديد (2013/2/25)… المضحك المبكى انى لو كنت دخلت الجيش كنت هخرج (2013/1/25)، يعنى هما أجبرونى أقضى الخدمة العسكرية فى السجن بدل الجيش… بس دة ميزعلنيش، أحسن ما كنت زمانى مجند فى جيش العار اللى بيقمع الثورة. المسجون دلوقتى أشرف من ظابط الجيش. 2011/12/14

- رسالة من شاب فقد عينه
من أكتر الرسايل اللى لمستنى جوا السجن، رسالة من حد اسمه ”مصطفى رمضان“ بيحكى فيها عن انه فقد عينه الشمال فى مجزرة محمد محمود، وبيشجعنى على مواجهة السجن… حسيت انى صغير. أنا فى الآخر فقدت سنين من عمرى وهرجع حر من تانى، لكن اللى بيفقد حتة من جسمه هيستمر من غيرها باقى عمره… اللعنة على العسكر الذين تركونا بين أسير وجريح. 2011/12/15

- أفكارى أهم من شخصيتى
جميل ان فيه ناس كتير ابتدوا يتكلموا عنى بعد شهور طويلة من الصمت والتجاهل، وجميل ان فيه ناس كتير مهتمين يعرفوا أكتر عنى… بس أنا شايف ان الناس المفروض تهتم بأفكارى أكتر من شخصى، لأنى فى الآخر محبوس بسبب أفكارى مش بسبب شخصى. أفكارى هيا اللى بضحى علشانها. 2011/12/15

- أحمد زبايدر
وائل غنيم رافع قضية (أو مقدم بلاغ) ضد أحمد سبايدر، يقوم الحاج سبايدر يقول فى التحقيق قدام النيابة ”ان واشنطن اتخذت من وائل غنيم وإسراء عبد الفتاح ومايكل نبيل عملاء لتنفيذ خططها داخل مصر“… بصراحة أنا اتلخبطت، من زمان بيقنعونى انى عميل لإسرائيل، دلوقتى يغيروا كلامهم ويقولوا عميل لأمريكا، متلخبطونيش معاكم بقى… العمالة مش هز أكتاف ‎:D‏ 2011/12/15

- نوعين من الهجرة
تحالف الإخوان والسلفيين فى البرلمان الجاى هيعمل نوعين من الهجرة فى مصر… الأول هو هجرة المسيحيين لأوروپا وأمريكا… والتانى هجرة المسلمين من الإسلام، أو بمعنى أدق هيكفروا من اللى هيشوفوه على يد الإسلاميين، وهنشوف فى عهد الإخوان أكبر موجة مد إلحادى فى تاريخ مصر. 2011/12/15

لينكات متعلقة:
* بيان : لن أخدم فى الجيش المصرى ، و أتحمل النتائج (20 أكتوبر 2010)

No comments: