Tuesday, November 1, 2011

قصاقيص، اتجننت فى سجن المرج – 12

- المشير كل شوية يطلع يقوللك ”سنضرب بيد من حديد“ وكأن اليد من حديد دى خارقة وبتعمل كل حاجة… اليد من حديد متقدرش تعمل حاجة للمَية، لا هتعورها ولا هتوجعها… اليد الحديد مش هتنفعك لما الثورة تبقى طوفان. 2011/10/4
- حياتى عبارة عن سلسلة طويلة من المرمطة…مرمطة فى البيت بعدها مرمطة فى المدرسة، بعدها مرمطة فى الجامعة، بعدها مرمطة فى الكنيسة، بعدها مرمطة فى السياسة، بعدها مرمطة على إيد الجيش، بعدها مرمطة على إيد مصلحة السجون… مش عارف بنتمسك بالحياه ليه؟! 2011/10/4
- النهارده تابعت الراديو طول اليوم علشان أسمع نتيجة جلسة الطعن بتاعتى، لكن محدش جاب سيرة… الغريب ان يوم جلسة طعن البلطجية اللى اتقبض عليهم فى شارع عبد العزيز، الراديو كان بيكرر خبر براءتهم كل نص ساعة، وكأن البلطجية أهم منى… السخيف بقى ان البلطجية دول اتقبض عليهم بعدى بشهر، ومع ذلك الطعن بتاعهم كان قبلى بحوالى أسبوع، وده ممكن يكون مؤشر عملى للتباطؤ والتعطيل اللى بتمارسه المحكمة العسكرية معايا. 2011/10/4
- طيب أنا دلوقتى شايف ان أى انتخابات جاية المفروض تبقى باطلة إذا مكنش موضوع المحاكمات العسكرية ده انتهى قبل الانتخابات… أنا مثلاً كنت بستعد علشان أنزل انتخابات مجلس الشعب، وبسبب قانون الطوارئ والمحاكم الاستثنائية ممكن ملحقش أخرج قبل معاد قفل باب الترشيح (ده بغض النظر عن انى صرفت نظرى عن الترشيح أصلاً)، وده معناه ان المحاكم العسكرية حرمت ناس من حقهم فى الترشيح، وده يبطل الانتخابات… كل انتخابات باطلة وانتم طيبين! 2011/10/4

- الجيش مالى البلد عروض عسكرية وجوية بتكاليف مليانة بزخ وكأن البلد عندها فائض فى الميزانية… معرفش ليه لهجة ”أجيبلكم منين؟“ مبتظهرش فى إنفاق المؤسسة العسكرية؟ 2011/10/5

- فيه ناس بتسألنى ”ايه الحاجات الإيجابية اللى اتعلمتها جوا السجن؟“ أنا عايز أقول ان السؤال ده قذر جداً، كأنك بالظبط بتسأل بنت تعرضت للاغتصاب: ”ايه الحاجات الإيجابية اللى اتعلمتيها من حادثة الاغتصاب؟“. السجن والتجنيد الإجبارى جرائم، ومن القذارة السؤال عن فوائد يستفيدها الفرد منها. 2011/10/5
- النهارده علقت على حيطة العنبر صورة لقيتها فى جريدة الشروق لمظاهرة فيها واحد رافع يافطة ”اكتب على حيطة الزنزانة، الطوارئ عار وخيانة“… أعتقد مباحث السجن هتكدرنى بسببها، بس قشطة. 2011/10/5
- مش عاجبنى الدور اللى بتلعبه الإدارة الأمريكية فى الفترة الأخيرة… مش عاجبنى أسلوب تعاملهم مع المجلس العسكرى والتحول الديموقراطى فى مصر… ومش عاجبنى عدم تعاطفهم أو تدخلهم فى قضيتى… أمريكا عمالة تنزل فى نظرى كل يوم عن اللى قبله. 2011/10/5
- النهارده عرفت باللى حصل فى المحكمة العسكرية امبارح بخصوص الطعن بتاعى، سفه ما بعده سفه… القاضى يأجل أسبوع علشان ملقيش ملف القضية قدامه على المنصة، مع انى بعد أسبوع هبقى كملت 50 يوم من غير أكل… العسكر بعقدة النقص المتوارثة عندهم من المثقفين مستمتعين انهم بيحاكموا واحد زيى، علشان كده بيماطلوا فى المحاكمة، مش عارفين انه هييجى عليهم يوم ويدفعوا التمن! 2011/10/5

- كيف تصطادين عريساً؟
خطوة رقم 1: أقعدى فى البلكونة وانتظرى مرور العريس المناسب تحت العمارة…‏
خطوة رقم 2: أول ما العريس اللى عليه العين يقرب، نطى من البلكونة عليه…‏
خطوة رقم 3: وانتى بتقعى حاولى تنشنى انك تقعى عليه بالظبط، وبكده تبقى اسطدتيه.‏
نظام الأسرة الاجتماعى ده سخافة مطلقة.‏
2011/10/6

- فى ذكرى حرب أكتوبر:‏
فى ذكرى حرب أكتوبر، أتمنى يتم نشر المعلومات الحقيقية عن الحرب وتكاليفها وعدد ضحاياها، وموقفنا ومواقف الدول التانية فيها بدقة… شعبنا من حقه يعرف الحقايق اللى مخبياها أجهزة المخابرات عنه. 2011/10/6
- فى إسرائيل، بعض النشطاء عاملين منظمة ضد التجنيد الإجبارى، واسمها ”نيو پروفايل“… الشاباك ”جهاز الأمن الداخلى فى إسرائيل“ اضطهدهم كتير بسبب نشاطهم، فكانت النتيجة ان منظمة نيو پروفايل اتحولت لمنظمة سرية علشان تحمى أعضاءها من المضايقات المخابراتية المتكررة… فى حركة لا للتجنيد الإجبارى فى مصر، كنا حريصين ان كل حاجة عننا تكون واضحة ومعروفة وفى النور، لكن واضح ان المخابرات المصرية مش هتسيبنا فى حالنا… السؤال اللى بيطرح نفسه: هل هما بيدفعونا اننا نتحول لتنظيم سرى؟ وهل ده فى مصلحتهم؟ 2011/10/6
- فى السجن، وخصوصاً مع الإضراب عن الطعام والشرب، بسأل نفسى كتير إذا كانت المبادئ اللى دافعت عنها تستحق كل التضحيات دى؟ الفكرة انى مضحيتش علشان مبدأ، أنا هعيش مرة واحدة بس، علشان كده عايز أعيشها بكرامتى من غير ما أطاطى راسى لحد… هو ده السبب اللى علشانه اتسجنت وضحيت وهضحى. 2011/10/6

- تصريحات طارق البشرى فى الجرايد بتفكرنى بالقاضى السنهورى… السنهورى هو اللى سهل لعصابة يوليو الإستيلاء على الحكم، وكان المقابل انهم بعتوله بلطجية مكتبه خربوه… البشرى برضه ضحك عليه العسكر، وبعد ما أخدوا منه التعديلات الدستورية، غدروا بيه وبكل اللى وافقوا على التعديلات. 2011/10/7

- صفقة إيلان مهينة:‏
الأخبار اللى بتتنشر عن صفقة تبادل إيلان جراپيل بـ50 سجين مصرى فى إسرائيل وأمريكا، مهينة جداً… يعنى المواطن الإسرائيلى يساوى 50 مواطن مصرى؟ ايه الإهانة دى؟ كمان أنا رافض اننا نتعامل بالشكل ده من المقايضات. السادات لما جه يسلم للإسرائيليين جثث الجنود الإسرائيليين اللى قتلوا فى حرب 1973، رفض يقايضهم بأى حاجة واتعامل مع الموضوع بشكل إنسانى… إشمعنى المسئول الإيرانى اللى تم اتهامه بالتجسس رحلناه من غير سجن ولا قضية ولا مقايضة، وإيلان معملناش معاه كده؟ 2011/10/7

لينكات متعلقة:‏
* قصاقيص، إتجننت فى سجن المرج – 3
* إذا أراد المصريين ألا يعيشوا فقراء للأبد
* نظام الأسرة الاجتماعى

No comments: