Saturday, June 18, 2011

إزاى تساعد مايكل نبيل فى سجن المرج؟

* The article in English: How to Help Maikel Nabil in Prison?

أجمل شىء فى الأزمات إنها بتخليك تشوف أصدقاءك المخلصين بوضوح. كل أزمة مريت بيها فى حياتى كانت بتكشفلى معدن الناس اللى حواليا… وأقدر أقول إنى سعيد جدا بالأصدقاء المخلصين اللى واقفين معايا فى معركتى دى، من جنسيات وأعمار وأديان وأيديولوجيات وأنواع متعددة، وكلهم بيبذلوا جهود شبه يومية علشان أرجع حر تانى… بشكرهم كلهم وأنا مدرك إن الكلمات متقدرش تعبر عن تقديرى لوفاءهم، لكنى واثق إن بعد خروجى هكون كسبت أسرة جديدة كبيرة أنتمى إليها.
النقط اللى هتكلم عنها دلوقتى هى بعض الحاجات اللى ممكن الناس تشارك بيها، علشان نقدر ندير معركة سلمية ناجحة، تساهم من ناحية فى حريتى، ومن ناحية تمنع المؤسسة العسكرية من تكرار نفس القمع مع أى حد تانى.

 1- ساعدنى فى توزيع مقالاتى
ساعدنى فى توصيل مقالاتى لأكبر قطاع من القراء… من ساعة القبض عليا كتبت 15 مقال، وصلهم لكل دايرة أصدقاءك… ممكن تساعد فى ترجمتهم، وتبعتهم لكل الصحف والمواقع المحلية والأجنبية.

 2- تظاهر من أجل حريتى
شارك مع صفحة ”الحرية لمايكل نبيل سند“ فى وقفاتهم فى التحرير أو قدام المحكمة العسكرية أو وزارة الدفاع… إنزل بيافطة ضد المحاكمات العسكرية للمدنيين، وإرفض السجن فى قضايا النشر.

 3- إكتب عنى
إكتب عنى على مدونتك وعلى الفيسبوك، وقول رأيك بصراحة حتى لو كنت مختلف معايا… كرر الكتابة، علشان القضية متموتش.

 4- البريد
ممكن تبعت جوابات بريد تساندنى، لحد من الجهات دى
أ. وزارة الدفاع (كوبرى القبة)… قول لوزير الدفاع إنك بترفض الحكم الصادر ضدى، وطالب بالإفراج الفورى الغير مشروط عنى.
ب. وزير الداخلية (ميدان لاظوغلى)… طالب بتحسين أوضاع احتجازى فى سجن المرج.
ج. جوابات ليا على عنوان السجن (سجن المرج العمومى)… الجوابات دى بتدينى دعم نفسى كبير… بس الجوابات دى بتتقرى قبل ما أستلمها وساعات مش بيدوهالى، لكنها بتحسس إدارة السجن إنهم المفروض يعاملونى أحسن.
د. جوابات ليا من خلال صفحة ”الحرية لمايكل نبيل سند“، ودى هتوصلنى من غير ما حد يقراها، وهرد عليك أول ما الجواب يوصلنى.

 5- كلم الصحافة عنى
كلم الصحفيين المصريين والأجانب اللى تعرفهم، وحفزهم على الكتابة عن قضيتى.

6- رشحنى لجايزة حقوقية: ده هيعمل ضغط كويس لصالح قضيتى.

7- تعالا زورنى فى السجن: بالتنسيق مع صفحة ”الحرية لمايكل نبيل سند“.

بكرر شكرى لكل اللى بيناضلوا علشان حريتى، وأؤمن إننا هنحتفل سوا قريب بحرية بلدنا من قمع العسكر.

من أجل الحرية

سجن المرج العمومى – القليوبية
عنبر التجربة – زنزانة 18
3/6/2011

1 comment:

Anonymous said...

هل حد ممكن يفيد إزاي أكلم الصحفيين الاجانب عن قضية مايكل ؟ أو إزاي أرشحه لجايزة حقوقية ؟ يعني من الأخر , الحاجات دي بتتعمل إزاي ؟